Amics Marchabrun, car digam
Un vers d'Amor, que per cor am
Q'a l'hora qe nos partiram
En sia loing lo chanz auziz.

Ugo Catola, er fazam,
Mas de faus' amistat me clam,
Q'anc pos la serps baisset lo ram
No foron tant enganairiz.

Marcabrun, co no m'es pas bon
Qe d'Amor digaz si ben non!
Per zo.us en mou eu la tenson,
Qe d'Amor fui naz e noiriz.

Catola, non entenz razon,
Non saps d'Amor cum trais Samson
Vos cuidaz e'ill autre bricon
Qe tot sia vers quant vos diz.

Marcabrun, no.s troban auctor
De Sanso.l fort e de sa'uxor
Q'ela n'avia ostat s'amor
A l'ora que ce fo deliz.

Catola, qar a sordejor
La det e la tolc al meillor,
Lo dia perdet sa valor,
Qe'l seus fo per l'estraing traiz.

Marcabrun, si cum declinaz
Qu'Amors si' ab engan mesclaz,
Dunc es lo almosna pechaz,
La cima devers la raiz

Catola, l'Amors dont parlaz
Camja cubertament los daz,
Aprop lo bon lanz vos gardaz,
Co diz Salomons e Daviz.

Marcabrun, amistaz dechai,
Car a trobat Joven savai!
Eu n'ai al cor ir' et esclai,
Qar l'en a levaz tan laiz criz.

Catola, Ovides mostra chai
E l'ambladura o retrai
Que non soana brun ni bai,
Anz se trai plus aus achaiz.

Marchabrun, anc non cuit t'ames
L'Amors, ves cui es tant engres,
Ni no fo anc res meinz prezes
D'aitals joglars esbaluiz.

Catola, anc de ren non fo pres
Un pas, que tost no s'en loignes,
Et enquer s'en loingna ades,
E fera, tro seaz feniz.

Marcabrun,quant sui las e.m duoill,
E ma bon'amia m'acuoill
Ab un baisar, quant me despuoill,
M'en vau sans e saus e garitz.

Catola, per amor deu truoill
Tressaill l'avers al fol lo suoill,
E puois mostra la via a l'uoill
Aprop los autres escharniz.