prosody | miscellaneous |
Autra vetz fui a parlamen El cel, per bon' aventura; E feiron li vout rancura De las dompnas que-s van peignen; Qu'eu los en vi a Dieu clamar D'ellas, qu'an faich lo teing carzir, Que se fan la ça l'a luzir De so qu'om degr'en els pauzar. Pero dis Dieus mout franchamen: "Monges, ben auch qu'a tortura Perdon li vout lor dreitura; E vai lai per m'amor corren, E fai m'en las dompnas laissar. Que ieu no'n vuoill ges clam auzir, E si no s'en volon giquir Eu las anarai esfassar. Seigner Dieus, fi m'ieu, chausimen Devetz aver e mesura De las dompnas, cui natura Es que lor caras teingan gen, E a vos no deu enojar; Ni·l vout no·us o degran ja dir: Que jamais no'n voiras ufrir Las dompnas denan lor, so·m par. — Monges, dis Dieus, gran faillimen Razonatz e gran falsura, Que la mia creatura Se genssa ses mon mandamen. Doncs serion cellas mieu par. Qu'ieu fatz totz jorns enveillezir, Si per peigner ni per forbir Podion plus joves tornar! — Seigner, trop parlatz ricamen, Car vos sentetz en l'autura. Ni ja per so la peingtura No remanra ses u coven: Que fassatz lor beutatz durar A las dompnas tro al morir, O que fassatz lo teing périr, Qu'oui no'n puosc'el mon ges trobar. — Monges, ges non es covinen Que dompna-s genz' ab penchura E tu fas gran desmesura, Car lor fas tal razonamen. Si tu o volguesses lausar, Ellas non o degran sofrir: Aital beutat que·l cuer lor tir, Que perdon per un sol pissar. — Seigner Dieus, qui be peing be ven, Per qu'ellas se donon cura E fan l'obra espessa e dura, Que per pissar no-s mou leumen. Pois vos no las volets genssar, S'ellas se genson, no vos tir; Abanz lor o devetz grazir, Si-s podon ses vos bellas far. — Monges, penhers ab afachar Lor fai manhs colps d'aval sofrir E no·us pessetz ges que lur tir Quan hom las fai corbas estar ? — Senher, fuecs las puesca cremar, Qu'ieu non lur puesc lur traucs omplir, Ans quan cug a riba venir, Adoncs me cove a nadar. — Monges, tot las n'er a laissar, Pos pissars pot lo tenh delir; Qu'ieu lur farai tal mal venir Qu'una non fara mais pissar. — Seigner, cuy que fassatz pissar, A Na Elys devetz grazir De Montfort, qu'anc no-s vole forbir, Ni n'ac clam de vout ni d'autar." |