Main PageTroubadours' ListingMore Works by Peire de Vic

The prosody guide is available as a book. Click here for details.

Manens e frairis foron companho;
Anavo per via cum autre baro,
E quant ylh anavon, mesclo-s de tenso:
Pauc tenc lur paria.
Quant l'us [d'eis] ditz oc e l'autre ditz no,
Quasqus te em pes la sua razo.
Ja de gran amor non aura sazo
En lur companhia.

Manens escomes lo frayri primiers,
Per erguelh d'aver quar si sent sobriers.
"Frairi, dis manens, trop vos faitz parliers
De gran gualaubia."
So ditz lo frairïs: "Si avetz deniers
Et avetz de blat vostres pies graniers,
Ja no viuretz mais, si·us etz renoviers,
La meitat d'un dia."

So ditz lo manens: "Frairi dechazey,
Tant avetz joguat, no·us laissetz espley;
Mas gabs avetz be ad egual d'un rey,
Ja us vers no sia."
So dis lo frairis: "Tôt vos o autrey;
Greu veiretz prohome qu'a temps no foley,
Mas vos guazanh-atz a tort e esdrey
Vostra gran folhia."

So dis lo manens: "Et ieu ai poder,
Qu'a mon amie puesc prestar e valer;
Mas de vos no cuyt que nuls bes n'esper,
Que ja mieills li'n sia."
So dis lo frayris: "Et ieu ai lezer
D'en tôt mon amie segre e valer
Atretan com vos et lo vostr'aver,
Estiers la baylia."

So dis lo manens: "Era·m di, frayris,
Quai ama mais Dieusï d'aquelh qu'es formis,
O dels raubadors que raubo·ls camis
Per lur leconia ?"
So dis lo frairis: "Aisso vos plevis,
Qu'aver ajostar non es paradis;
Ans comandet dieus qu'om lo departis
Tot per cofrairia."

So dis lo manens: « Vostre folhs talans
E taulas e datz e domnas prezans
vos fan far enguans
E pensar bauzia. »
So dis lo frairis: « Vos etz lo grayssans,
Que cuydatz que·us falha la terra qu'es grans
Guazanhatz enfern ab autrui afans,
E faitz hi bauzia. »

........................................
So dis lo frairis: « De trop es pensatz
Quan los mortz e·ls vius capdelar cujatz;
Pensaria-s hom que sen [non] ajatz,
Qui no·us conoyssia.

So dis lo manens: « Ieu quier jutjador,
Frayri, que nos parta d'aquesta clamor,
........................................
El coms d'Urgel sia.

So dis lo frairis: « Ben es fazedor
Quez elh o define en dreg et amor,
........................................
Quar tostemps tenria.