prosody | miscellaneous |
Fort m'enoja, si l'auzes dire, Parliers quant es avols servire; Et hom qu vol trop autr'aucire M'enoja, e cavals que tire; Et enoja·m, si Dieus m'ajut, Ries hom quan trop porta escut Quan sol u colp no·i a agut, Capela e morgue barbut, E lausengier bec esmolut. Enoja me domn' envejosa Quant es paubra et orgoillosa, E marritz qu'ama trop sa sposa, Neus s'era domna de Tolosa; Et enoja·m de cavallier For de son pais ufanier, Quant en lo sieu non a mestîer Mais sol de pestar en mortier Pebre o de tastar sabrier. Enoja mi d'autra maneira Hom volpilz quan porta baneira, Et avols austors en riveira, E paucs manjars en gran caudeira, Et enoja·m, per saint Marti, Trop d'aiga en petit de vi; E quan trob escassier mati M'enoja, e d'orb atressi, Car no m' azaut de lor cami. Enoja·m longa tempradura, E carns quant es mal coita e dura, E prestre qui m en ni-s perjura, E puta veilla, quan trop dura. Et enoja·m, per saint Dalmatz, D'avol home en trop gran solatz; E corre quan per via a glatz E fugir ab caval armatz M'enoja, e·l maldirs de datz. Et enoja·m, per vita eterna, Manjar ses foc, quan fort iverna, E jaser cum veilla calerna (?), Quant ella flaira en la taverna. Et enoja·m, car es de fer, Avols hom qu'a bella moiller, E per gelosia la fer, E fai o be qui la enquer E no lo lai per marit fer. Enoja me per saint Salvaire, En bona cort avols violaire, Et en pauca terra trop fraire, E a bon joc paubres prestaire. Et enoja·m, per saint Marsel, Doas penas en un mantel, E trop parier en un castel, E rics hom ab pauc de revel, Et en tornei dard e quairel. Enoja me, si Deus mo vailla, Longa tabla ab bref toailla, Et hom ab mas roinos, quan tailla, Et ausbercs pesanz d'avol mailla; Et enoja·m estar a port Quan trop cor greu venz e plou fort; E entre amies dezacort Aquel enois m'es peiz de mort, Quan sai que tenson a lor tort. E dirai vos que fort me tira Veilla gazais quan trops atira E paubra soudadeir' aira, E donzels qui sas cambas mira. Et enoja·m, per saint Aon, Dompna grassa ab magre con, E seignoratz que trop mal ton; Qui no pot dormir quant a son Major enoi non a el mon. Ancar i a mais que m'enoja: Cavalcar ses capa ab ploja, E quan trob ab mon caval troja Oui sa manjadoira li voja. Et enoja·m e no·m sap bo De sella, quan crolon l'arço, E fivella ses ardaillo, E malvaitz hom dins sa maiso, Car no di ni fai s'enoi no. |
Can't hear anything? Click here to download the original melody (MIDI).