Main PageTroubadours' ListingMore Works by Peire de Vic

The prosody guide is available as a book. Click here for details.

Ades on plus viu mais apren,
E mais sai de mal e de be,
E meills sai conoisser en me
Et en autrui foldat e sen.
Sel que ditz tôt jorn follia
E si meteis non chastia,
Non obra ges a dreg garan;
E sil que·m blasmon car non chan
Degron blasmar los lur faitz deschausitz,
Qu'eu chantera si chantars fos grasitz.

Qu'eu non chasti ni non repren,
Que chascus sap consi-s capte,
Mais gen fora c'on vis en se
So que conoîs en l'autra gen.
Mas ben die que pauc valria
Chans si d'amor no movia;
E de mi a passât un an
C'amors no·m tenc ni pro ni dan,
Mas er sui gais que jois d'amor m'es guitz;
Conven qu'eu chan, c'a dreit port son eissitz.

Qu'amors m'esmenda ben e gen
Los mais qu'eu n'ai sufFertz ancse,
C'amar mi fai per bona fe
La meillor e la plus plasen,
E tal c'a en sa baillia
Tot quant eu voill ni queria.
C'anc natura non obret tan
C'altra'n fasses del sieu semblan,
Qu'en leis es jois restauratz e norritz
Qu'era aillors sordeiatz e faillitz.

Lo cors a gai e covinen
Entier, que ren no·i descove,
Et beutatz no·i va ni no·i ve
Anz i a fait son estamen.
Jois e pretz e cortezia,
Solatz senes vilania,
Convinenz ditz e faitz presan
Sojornon ab leis, et es tan
De totz bos aibs sos gens gais cors garnitz,
Que totz los mais n'a loingnatz e faiditz.

Lo cors e·l cor e·l pensamen
Ai en leis, que d'ais no·m sove,
Ni ja pensar non voill de re
Mas can del sieu enansamen.
Plus qu'en la mar non parria
L'aiga, qui plus n'i metria,
Non pareis el sieu cors presan
Lo bens qu'eu clic de lei lausan.
Pero vers es so que·l proverbes ditz,
Que bos pretz creis on plus loing es ausitz.

Dompna, no·us prec ni non enten
Que vos m'ametz, ni no-s cove,
Car sitôt cresiatz merce,
Paratges sai que·us mi defen;
Mas d'aisso·us prec si·us plasia,
Domna, que s'ieu ren disia
Que·us fos plasen ni benestan,
Que de vos n'aia sol aitan,
Mi voill onrar vostre gens cors chausîtz;
Vos non er dans e·l mieus jois n'er complitz.

Si ja rasos no·m disia
Que de mi donz Na Maria
Parles re que fos benestan,
Veritatz mi fai dir d'aitan;
Que·l sieus noms es sobr'autres noms grasitz
E·ill sieu fait son de pretz sims e raitz.