Main PageTroubadours' ListingMore Works by Guilhem de l'Olivier

The prosody guide is available as a book. Click here for details.

Gauch e solatz e cortezia
E suaveza e bontatz
Fan home estar en agratz
En son alberc et on que sia.
Car bontat es ab suaveza
Menistrairitz de lialeza,
E lialtatz es razitz de mezura,
E mezura es seror de drechura!
El drechura mair' e don' esta cauza
Per que las gens s'en regisson en pauza.
Per que totz homs c'aia sen e saber
Si deu penar d'aitals vertutz aver.