| |
|||
| prosody | miscellaneous |
Ar me puesc ieu lauzar d'Amor, Que no-m tol manjar ni dormir! Ni-n sent freidura ni calor Ni no-n badail ni no-n sospir Ni-n vauc de nueg arratge. Ni-n soi conquistz ni-n soi cochatz, Ni-n soi dolenz ni-n soi iratz Ni no-n logui messatge! Ni-n soi trazitz ni enganatz, Que partitz m'en soi ab mos datz. Autre plazer n'ai ieu maior, Que no-n traisc ni fauc trair, Ni-n tem tracheiris ni trachor Ni brau gilos que m'en azir! Ni-n fauc fol vassalatge, Ni-n soi feritz ni derocatz Ni no-n soi pres ni deraubatz! Ni no-n fauc lonc badatge, Ni dic qu'ieu soi d'amor forsatz Ni dic que mos cors m'es emblatz. Ni dic qu'ieu mor per la gensor Ni dic que-l bella-m fai languir, Ni non la prec ni non l'azor Ni la deman ni la dezir. Ni no-l fas homenatge Ni no-l m'autrei ni-l me soi datz! Ni non soi sieus endomenjatz Ni a mon cor en gatge, Ni soi sos pres ni sos liatz Anz dic qu'ieu li soi escapatz. Mais deu hom lauzar vensedor Non fai vencut, qui-l ver vol dir, Car lo vencens porta la flor E-l vencut vai hom sebelir! E qui venc son coratge De las desleials voluntatz Don ieis lo faitz desmezuratz E li autre outratge, D'aquel venser es plus onratz Que si vensia cent ciutatz. Pauc pres prim prec de pregador, Can cre qu'il, cuy quer convertir, Vir vas vil voler sa valor, Don dreitz deu dar dan al partir! Si sec son sen salvatge, Leu l'er lo larcx laus lag loinhatz Plus pres lauzables que lauzatz: Trop ten estreg ostatge Dreitz drutz del dart d'amor nafratz. Pus pauc pres, pus pres es compratz. Non voilh voler volatge Que-m volv e-m vir mas voluntatz Mas lai on mos vols es volatz. |