Main PageTroubadours' ListingMore Works by Peire Cardenal

The prosody guide is available as a book. Click here for details.

Aquesta gens, cant son en lur gaieza,
Parlon d'amor e no sabon que s'es!
Quar fin' amors mou de gran lialeza
E de franc cor gentil e ben apres,
E el cuion de luxuria
E de tort que bon' amors sia!
Mas en derrier o poiriam vezer
Que lur amor viron en mal voler.

Cort cug qu'ieu sai qu'es corta de largueza,
Ab cortz servirs, ab cortz dos, ab cortz bes,
Ab cort' amor et ab corta franqueza,
Ab cortz perdos et ab cortas merces!
E cort ab corta cortezia
E ab corta dousa paria,
E quar son cort li joi e li plazer
Per aquo deu lo nom de cort aver.

Mas ieu quier cort que-s descort ab cruzeza
E que s'acort ab totz fis fais cortes,
E qu'en plan pres puei per plana proeza
E, quan que cost, sus sia son conques!
E cort de mil amicx amia
On fals ni francx non s'afadia,
Ab que s'acort la valors ab voler,
E-l gaugz ab dreg e-l donars ab dever.

Qui men soven e vol que hom lo creza
Ab gent ses sen lauzara si metes,
Que-l ven despen en luec d'autra riqueza
Don pren nien sel cui ren a promes:
Egal li val oc que fadia,
Que-l qual qu'aital mercadaria
D'enjan penran aisso podon saber:
Cujan, auran nien al cap del ser.

Que fan l'enfan d'aquella gens engleza
Qu'avan no van guerreiar ab Frances
Mal an talan de la terr' Engolmeza:
Tiran iran conquistar Gastines.
Ben sai que lai en Normandia
Dechai e chai lur segnoria
Quar los garsos vezon en patz sezer:
Antos es tos qui trop pert per temer.

Lo pros dels pros me plazeria
E-l mal dels mals, si s'avenia:
Qu'en tal ostal estau matin e ser
On, vuelh que-m vuelh, ai trastot mon voler.