home page ?


Atressi com per fargar
Es hom fabres per razo,
Es hom laires per emblar
E tracher per tracio:
Que d'aquel mestier qu'om fai
Li aven us noms e-l n'eschai,
Que tal en sai--que, s'om o auzes dire,
Per so c'a fag for' apellatz traire.

En Velai si fan joglar
Del saber de Gainelo!
Per que es dig qu'om si gar
Si co-l proverbis despo:
Ja no-t fizar en Velai
Ni en clergue ni en lai,
Qu'un pauc retrai-- al premier trabustire
Que fes Cayms, don avem auzit dire.

Ben es fols qui cuia far
Aisso que anc fach non fo!
Qu'en cug trachors chastiar
E treball m'en en perdo,
Que si Dieus non los deschai
Mais n'er que d'anhels en mai.
Que quan l'us trai -- ab fatz et ab aucire
L'autre ab ditz e l'autre ab escrire.

Quan trachor troba son par,
D'aquel fai son compainho,
Qu'a tracion apastar
An ops trachor e gloto.
E quan l'us trais desai
E l'autre trais delai,
E quan l'us vai -- l'autre fai lo martire,
Quan l'us lassa, l'autre-s pensa l'albire.

Trachor soli'om cassar
E penre coma lairo,
E aras lo ten hom car
E'n fai sescalc o bailo!
E si gran prelatz i chai
D'un fort gran trachor verai,
A hom esmai -- que-l puesca el luoc assire
Qu'en sia donz e segner e regire.

Sirventes, ades t'en vai
On que-t vols e digas lai
Qu'a mi non plai -- tracios ni traire,
Qui-s vol m'en am e qui-s vol m'en aire.