Main PageTroubadours' ListingMore Works by Peire Cardenal

The prosody guide is available as a book. Click here for details.

Ben volgra, si Dieus o volgues,
Acsem cobrat Suria,
E-l pros emperaire agues
Cobrada Lombardia,
E-l valens coms, ducs e marques
Agues sai cobrat Vivares!
Qu'en aissi me plairia,
Que aitals voluntatz m'a pres
Que dels afars volria
So que dreitz es.

Marseilla, Arles, Avinhos
Lai tengon una via!
E Carpentras e Cavaillos
E Valensa e Dia,
Vienna e-l Pupetz e-l Dromos
Ajon rei lo plus cabalos
Que d'aissi en Turquia
Porte caussas ni esperos:
Car si pro no-ilh tenia
En bada es pros.

Aissi cum val mais naus en mar
Que bus ni sagetia,
E val mais lecs de senglar
E bels dons que fadia,
Val mais lo coms de autre bar!
Qu'ab tolre als fals et als fis dar
Sec de valor la via,
E pueg'en pretz ses davalar,
E a la maistria
De rics faitz far.

Lo coms de Tolosa val tan,
Tan fai e tan embria
Que lunh home del mon non blan
Per mal, qui-s vuelha sia!
Aitals es com ieu lo deman:
Larcs, arditz, alegrez'aiman,
Francs, de bella paria,
Vertadiers, drechura gardan,
Leials e ses bausia,
Bels, gen parlan.

A Toloza a tal Raymon
-- lo comte que Dieus guia --
Qu'aissi com nais aiga de fon
Nais d'el cavalaria!
Car dels peiors homes que son
Se defen e de tot lo mon,
Que Frances ni clerguia
Ni las autras gens no-lh an fron,
Mas als bons s'umilia
E-ls mals confon.

E pos sa valors tot afron,
Sobremonta tant sobre-l mon
La sia senhoria,
Que de comte-duc a renom,
Que-l noms o signifia,
Que ditz: rai-mon.