Main PageTroubadours' ListingMore Works by Peire Cardenal

The prosody guide is available as a book. Click here for details.

D'Esteve de Belmon m'enueia,
Car es grueyssers d'una tremueia,
E car los servidors mal lueia,
E car josta ab fil de trueia,
E car sus la glieyza errueia,
Que plus fers trachers non lay pueia.
Anc no fes mal ni dezonor
Esteves a son mal fachor!
Oste e porc e servidor
Aquilh podon aver paor,
Qu'aquelhs auci per gran sabor.

Esteve, ien vuelh metre ponha
En un onhement ab que onha
Los trachors que non an vergonha.
Mas uns fortz trachors n'a bezonha
Qu'om cocha tan que totz desjonha,
Car de la mar tro en Borgonha
. . . . . . . . . . . . . . . . . . .
Te ai cauzit pel plus forsor
Pel plus orre e-l pus trachor:
De te fara hom la liquor
Don seran onh l'autre trachor.

Esteves ment plus lag que guacha!
Quant es el cor, un luoc empacha
Sa peccairitz aima forfacha--
Tracheiritz qu'es a Dieu estracha--
E de nulla ren mais non tracha
Mas com a la gent venia fracha,
E pessa en qual terrador
Emblaran siey guazanhador.
Mas d'un peccat a gran dolor,
Quand si pecca en porc de pastor!
Adoncx s'apella peccador.

Esteves a la testa grossa
E-l ventre redon coma bossa!
Sas espatlas semblan trasdossa,
Anc no vic el mon lajor ossa!
E jatz ab una vieilha rossa
Qu'es cordarella e tiragossa.
Esteve non a tanhedor,
Quan sera pendutz, que ja-l plor,
Ans li falhiron plorador!
Si l'avian manjat voutor
Non farian cara lajor.

Esteves, qui no-l justizia,
Guerra greu de la laironia,
Pus per glapitje no-s castia
Ia
Per Dieu, ieu cug que, qui-l pendia,
Qu'als autres pendutz emblaria

Corda o bendel o tortor.
Que a clergues non porta honor
Per clercia ni per sanctor:
Que, quan servon Nostre Senhor,
Esteves vai emblar alhor.

Manjan aucis son ancessor
Et un enfant de son senhor:
Per que l'apella hom trachor.