The Democratic Republic of Poetry
Peire CardenalTroubadoursProsodyNoveltiesAnamorphisms

The prosody guide is available as a book. Click here for details.

Falsedatz e desmezura
An batailla empreza
Ab vertat e ab drechura
E vens la falseza.
E deslialtatz si jura
Contra lialeza,
E avaretatz s'atura
Encontra largueza!
Feunia vens amor
E malvestatz valor,
E peccatz cassa sanctor
E baratz simpleza.

Si es homs que Dieu descreza,
Sos afars enansa
Ab que non aia grineza
Mas d'emplir sa pansa.
E qui s'enten en sancteza
Trai greu malanansa!
A cui platz dreitz e tortz peza
Soven a grevansa!
Et an l'enganador
De lur afar honor:
Qar li mal entendedor
Jujon per semblansa.

Aras es vengut de Fransa
Que hom non somona
Mas sels que an aondansa
De vin e d'anona,
E c'om non aia coindansa
Ab paubra persona,
Et aia mais de bobansa
Aquel que meins dona,
E qu'om fassa major
D'un gran trafegador
E qu'om eleia-l trachor
E-l just dezapona,

Coms Raimons, ducx de Narbona,
Marques de Proensa,
Vostra valors es tan bona
Que tot lo mon gensa,
Car de la mar de Baiona
Entro a Valensa
A grans gens falsa e felona,
Laj'en viltenensa!
Mas vos tenes vil lor,
Que Frances bevedor
Plus que perditz a l'austor
No vos fan temensa.

Ben volon obediensa

Sels de la clersia,
E volon ben la crezensa
Sol l'obra no-i sia!
Greu lor veires far failhensa
Mas la nueg e-l dia,
E no portan malvolensa
Ni fan simonia,
E son larc donador
E just amassador,
Mas autre n'an la lauzor
E-ilh la folia.

Non puesc dire l'error
Del fals segle trachor
Que fai de blasme lauzor
E de sen folia.

Deu prec per sa dousor
Que-ns gar d'enfernal dolor,
E-ilh verge Maria.