prosody | miscellaneous |
L'afar del comte Guio E de la guerra del rey E de Mauzac lo barrei, Ai ben ausit cossi fo, Mas encaras non aug dire Que tant es pros e cabals, Laissa los morgues aussire De Sant Chafre! ar m'en gic, Car dreitz no i troba abric Ab los laics ni ab los clers, Aissi-ls encaussa avers. Poders a tout la maizo De Camalieiras ses drei, E-l Monestier decazei . . . . . . . . . . . . . . . . . . . o Don l'abas es en consire E-l covens, car deslials Los gieta de lurs ostals Ses razon que n'es a dire! C'anc pos Santz Chafres moric Hom tan lag non envazic Lo Monestier ni-l dezers. Gardas si's a Dieu plazers En luec de processio Iram sarrat et estrei, Armat al caut et al frei, Trompan en luec de trinho. Mas feunia m'en fai rire, Quar la mainada reials Degra ben esser aitals Que tolgues aquel martire. Quar qui non ten dreg del ric Ja no-l tengua del mendic: Que dreitz non es mas volers Can l'entortezis avers. Trabuc ni gran capairo No-y valran ni lait aplei, Ni-l regla sant Benezei, Mas ausberc e gambaizo! E silh que solion dire Las pistolas els missals Trairan peiras reversals, E lai on eron sautire Trevaran massas e pic, E qui anc se revestic Esti' armatz e aders Si vol esser morgues vers. Encar veira hom sazo Que-l segles non aura lei, E clerc iran a tornei Et hom non aura que frire Si non es forts deslials! E qui er trachers ni fals Sera maistres e sire, E can Dieus aura amic Non trobara on se fic: Aissi er lo mons aders Que per tot er non-devers. Nostre clergue solon dire Que raubar autrui ostals Era peccatz criminals E il an raubat sant Gire E dizon en lur prezic Que hom am son enemic, Mas a nos mostra vezers Qu'en lur es autres volers. |