Main PageTroubadours' ListingMore Works by Peire Cardenal

The prosody guide is available as a book. Click here for details.

L'arcivesques de Narbona
Ni-l reys non an tan de sen
Que de malvaiza persona
Puescan far home valen:
Dar li podon aur e argen
E draps e vin e anona,
Mas lo bon ensenhamen
A sel cui Dieus la dona.

Quar ab renda gran e bona
Sai ieu un caitiu dolen,
Que non fai condug ni sona
Ni somon ni acuelh gen,
Anz conquer mal e pietz despen,
E si-l donavas Baiona,
Non metria lo renden
Si cum Valors faissona.

Valors vol que hom somona
E gast e don e prezen,
E a una companhona,
Caritat, que lo consen!
E aqui on valors s'esten
E caritatz esperona,
Malvestatz es per nien
de lop o de serpen,
Car qui tol e trais e men
E aussi e empoizona,
Ad aquo es aparven
Cals volers i brotona.

Ar diran que ieu espona
Mon sirventes a la gen,
Quais qu'aia lengua grifona,
Que negus hom no m'enten.
Assatz m'entendran l'entenden!
E a l'autre gent bricona,
Chantarai dels filhs n'Arsen
E de Bueve d'Antona.

De gran trachor sobresaben,
Dezir que tals lo somona
Que-l do d'atretal pimen
Quant el als autres dona.