Main PageTroubadours' ListingMore Works by Peire Cardenal

The prosody guide is available as a book. Click here for details.

Per fols tenc Polhes e Lombartz
E Longobartz et Alamans
Si volon Frances ni Picartz
A senhors ni a drogomans,
Car murtrir a tort
Tenon a deport,
E ieu non lau rei
Qui non garda lei.

Et aura-ill ops bos estendartz
E que fiera mielhs que Rotlans
E que sapcha mais que Rainartz
Et aia mais que Corbarans
E tema meins mort
Que-l coms de Monfort,
Si vol qu'ab barrei
Lo mons li soplei.

E sabetz qual sera sa partz
De las guerras e dels mazans
Lo cels e-l paors e-l regartz
Qu'el aura faitz e-l dols e-l dans
Seran sieu per sort!
D'aitan lo conort
Quab aital charrei
Vendra del tornei.

Hom, petit val tos sens ni t'artz
Si pertz t'arma per tos efans,
Per l'autrui carbonada t'artz
E l'autrui repaus t'es afans:
Pois vas a tal port
On cre qu'usquecx port
L'engan e-l trafei
E-ls tortz faitz que fei.

Anc Carles Martels ni Girartz
Ni Marsilis ni Agolans
Ni-l reis Gormons ni Izembartz
Non aussizeron d'omes tans
Que n'aion estort
Lo valen d'un ort,
Ni non lur en vei
Aver ni arnei.

Non cre qu'a la mort
Negus plus en port
Aver ni arnei
Mas los faitz que fei.