Main PageTroubadours' ListingMore Works by Peire Cardenal

The prosody guide is available as a book. Click here for details.

Qui se vol tal fais cargar qu'el fais lo vensa,
A derrier repren la fins la comensansa:
Per que se deu suenh donar qui ben comensa
Que-l comensars ab la fin aia acordansa,
Qu'al comensar sec honors
Quant en la fin es lauzors
E lauzor es en las fis
Dels bels ditz e dels fatz fis.

Bos comensars es sabers e conoissensa,
Leials caritatz e fes e esperansa
C'om aia en fatz e en ditz e en crezensa:
Que-l comensars ses la fin petit enansa,
Que de grans comensadors
A motz per los refreitors
E pels autres luocx assis,
Ab trop de mais e de sis.

Entre floc e gambaiso a diferensa
Et entre alba e jorn clar, a ma semblansa,
Que cant hom vai al mostier far penedensa
No-i viest ges son gambaiso ni pren sa lansa,
Ni porta draps de colors
Ni esparviers ni austors,
Anz fai so que-l regla dis
Per anar en paradis.

Tal n'i a que vai jurar obediensa,
Mas aprop lo sagramen n'agr'ops fermansa.
Que sel non ten castitat ni paciensa,
Anz fer e franh et enpenh e peiras lansa.
Ancar veira hom priors
Combatens e jostadors,
Mas mal sembla san Daunis
Qui se ni autrui aunis.

Aquist ric home non son ges de Valensa
Anz son de Gap e d'Albrac, deforas Fransa!
De Bauzac e de Cruas es lur semensa
D'escarnar e d'escuissar grans es la dansa,
E son finas lur amors
Con de lops e de pastors,
E lur solatz e lur ris
Plus poinens que mors canis.

Bostias, vai-t-en de cors
En Vianes, per secors,
Vezer on es lo Dalfis,
Si es de Gap o dels fis.