| prosody | miscellaneous |
Senh En Ebles, vostre vezi Son tan valen e tan huma Que si las peiras eron pa E que las aigas fosson vi E li puei bacon e pouzi, Non serian larc, tals n'i a. Tals n'i a, mas non dirai qui, Que foron porc en Gavauda, Et en Vianes foron ca Et en Velaic foron masti Segon l'afaitamen cani: Mas car non an coa rema. En jurar de femna no-m fi Ni son sagramen non vuelh ja, Car si-l metias en la ma Per ver dir un maraboti E per mentir un barbari, Lo barbaris gazanhera. Tals a lo semblan enfanti Que-l sens es de trebellia, E-l lenga de logicia E-l voluntatz d'En Alengri! Tals a belh cors e saura cri Que dins a fel cor e vila. Dig vuelh aver de sarrazi E fe e lei de crestia, E sotileza de paia Et ardimen de tartari. E qui es garnitz enaissi Val be messongier castella, Can fai tort e messonjas di Atressi com de tals n'i a. |