Main PageTroubadours' ListingMore Works by Peire Cardenal

The prosody guide is available as a book. Click here for details.

Tendas e traps, alcubas, pabalhos
Veyrem tendre per pratz e per vergiers,
Josta l'aigua, pres Leitor', als cambos:
Que-l coms Guerantz vol mais pretz que deniers,
E no-s trebalh hueimais sieus senhairiers
De sercar patz, c' Armanhac vol onransa!
Mas si fora qu'el fes d'argen esmansa
Volgra trop mais la patz qu'esser guerriers.

Cavals armatz, ausbercs e gonios,
Massas e brans e escutz de cartiers,
E bos vassalhs en destriers milsaudos
Veirem a massa espandir pels graviers,
De l'autra part calabres e peiriers,
E sus el pon ferir mans colps de lansa,
E non auran l'us de l'autre pezansa
Can se veiran pesseiar a cartiers.

Lansas e dartz, senhieiras e penos
Larcs ab batalhs, veirem per los sendiers
D'Armanhagues, e falsartz e pilos
Veirem pel plan desserrar als arquiers:
Adoncx parra qui er bos cavaiers
Ni qui sap mielhs anar en aital dansa,
Et home d'Aug no me son en membransa
C'als majors colps los trobarem premiers.

E d'aisai veno n'Aymanieus e-n Gastos
Esperonantz ab Gascos a milhiers,
E-l coms de Fois, cascus tan coratjos
Que niens fon Rotlans ni Oliviers
Encontra lor, Anselotz egaliers.
Anc d'aitals tres non ac parlat en Fransa,
Que l'enemic en son en gran duptansa:
Pero mos datz es un pauc plazentiers.