Main PageTroubadours' ListingMore Works by Peire Cardenal

The prosody guide is available as a book. Click here for details.

Tostemps vir cuidar en saber
E camgi so cug per so sai,
E lais mentir per dire ver,
E azir tort e dretz mi plai,
E blasmi mal e lauzi be,
E mostri gaug e dol escon,
E soi compaingz de bona fe
Car es ab me et ab leis son.

Per so n'ai pezar e plazer
E m'en irais e m'en apai
E n'ai amor e mal voler
Ab tal que mal ni be non fai!
E per aco ieu am en re
Et azir en re cest d'amon:
Car en re fai so que-s cove
Et en re escorja e ton.

Et per aco no-m puesc tener
Qu'ieu non diga d'aquel de lai
Que Dieus lo degra dequazer
Si com el los autres dequai,
E qu'el trobes aital merce
Com trobon aquil qu'el cofon.
Car los destrus non sap per que
E los fai fugir non sai on.

Si hom pogues lo cor vezer
Del malvais ric home savai
Tant i vir' hom d'avol aver
Que fera paor et esglai
Per que volgra, car hom no ve
Lo malvais voler deziron,
Que la malvestat qu'a en se
Portes escricha sus, el fron.

Ricx homs malvais de gran poder
Que gent viest e manja e jai,
E non vol als autres valer,
Sembla lo ric que hom retrai,
Que, quar manjava ad esple
E vestia lo mieilz del mon
E non donava son conre,
Deissendet en enfer, preon.

Las doas vias que hom te
Vos farai entendre cals son:
L'una fai mal, l'autra fai be,
L'una vai aval, l'autr' amon.