home page ?


Tot farai una demanda
A cui qui respondre vueilla:
Si avers ni terra granda
A negun home aonda
Qu'ieu vei los plus rics e-ls plus granz
Que tolon cent milia aitanz
Quez aquill qe non an renda.

Non vueil esser reis d'Irlanda
Per tal qu'ieu emble ni tueilla
Castel ni tor ni baranda,
Ni que l'autra gen confonda.
Qui pert Dieu per autrui avanz
Ni s'arma per autrui bezanz,
Razos es que mal l'en prenda.

Razos vol e dretz comanda
Que qui semena que cueilla:
Cal que semensa qu'espanda,
Aital frug coven que tonda.
E qui fai los enueis ni-ls danz,
Sertz sia que al autre lanz
Penra dan, can que atenda.

Tal n'i a qui non garanda
Mas son voler, cui que dueilla.
Mentre que porta garlanda
Ez es gais ab testa blonda,
Gieta por lo joi de mil anz
Por estar un pauc en bobanz:
Per qu'es razos que deissenda.

Non cre que-l genz alamanda
Seinhor tolledor acueilla,
Ni que mal parta vianda
Ni que per manjar s'esconda,
Ni que sia dezeretanz
Ni que dezeret los enfanz,
Ni que conduch lai revenda.

Tals cuida far gentils enfanz
Que-ls fai renoviers e truanz,
Tolledors, plens de rozenda.