home page ?


Ab votz d'angel, lengu'esperta, non bleza,
Ab motz sotils, plans plus c'obra d'engles,
Ben assetatz, ben ditz e sens repreza,
Miels escoutatz, ses tossir, que apres,
Ab plans, sanglotz, mostran la via
De Jhesu-Crist, que quex deuria
Tener, com el per nos la volc tener.
Van prezican com puescam Dieu vezer...

Si non, con il, mangem la bona freza
E-l mortairol si batut c'o-l begues,
E-l gras sabrier de galina pageza
E, d'autra part, jove jusvert ab bles,
E vin qui millior non poiria,
Don Franses plus leu s'enebria.--
S'ab bel vieure, vestir, manjar, jazer
Conquer hom Dieu, be-l poden conquerer

Aissi con cil que bevon la serveza
E manjo-l pan de juel e de regres,
E-l bro del gras buou lur fai gran fereza
Et onchura d'oli non volon ges,
Ni peis fresc gras de pescaria,
Ni broet ni salsa que fria.
Per qu'ieu conseil qui 'n Dieu a son esper
C'ab lurs condutz passe, qui 'n pot aver.

Religios fon, li premieir', enpreza
Per gent que treu ni bruida non volgues,
Mas jacopin apres manjar n'an queza,
Ans desputan del vin, cals mieillers es,
Et an de plaitz cort establia
Et es Vaudes qui-ls ne desvia!
E los secretz d'ome volon saber
Per tal que miels si puescan far temer.

Esperitals non es la lur paubreza:
Gardan lo lor prenon so que mieus es.
Per mols gonels, tescutz de lan' engleza,
Laisson selis, car trop aspre lur es.
Ni parton ges lur draparia
Aissi com sains Martins fazia:
Mas almornas, de c'om sol sostener
La paura gent, volon totas aver.

Ab prims vestirs, amples, ab capa teza,
D'un camelin d'estiu, d'invern espes,
Ab prims caussatz -- solatz a la francesa
Can fai gran freg -- de fin cuer marselhes,
Ben ferm liatz per maistria,
Car mal liars es grans follia,
Van prezicant, ab lur sotil saber,
Qu'en Dieu servir metam cor e aver.

S'ieu fos maritz, mot agra gran fereza
C'oms desbraiatz lonc ma moiller segues,
Qu'ellas e il an faudas d'un' ampleza
E fuoc ab grais fort leumen s'es enpres.
De beguinas re no-us diria:
Tals es turgua que fructifia,
Tals miracles fan, aiso sai per ver:
De sainz paires saint podon esser l'er.