| |
|||
| prosody | miscellaneous |
S'ieu fos amatz o amés Eu chantera qualque vès, Mas car aisso non i ès, Eu non sai de que·m chantés. Pero en cor ei Que, si a Deu plai, Questa ves essai Consi chantarei De m'ami quan l'aurei. Lo plu fis drutz qu'anc nasqués For'eu, si amia aguès, Que, ja plazer no·m fezès, Eu fora sos homs adés. Qu'una ves amei E per aisso sai D'amor consi vai, Ni com amarei Autra ves, quan mi volrei. Amors, qui la semenés, Nasquera aitan espès Que d'un grat n'agra hom très E d'un plazer mais de dés, E vint d'un donnei! E d'un jai verai Nasqueran cent jai, Tro·m disses: eu n'ei Mil tanz que non semenei. Dompneis es tornatz atrés, Que li pros e li cortès N'an los mals, e·ill croi los bès! Que qan donpnas an bon prés Volon qu'om pros prei E fan al savai! Lo fals n'a: lo fai E·l fis: lo farei! Per qu'eu lor lauzor non ei. D'ar mantas, falsas en pés, Fan estar los descortès E dan penas totas vès Als leials amanz confés! Per qu'om lor deu frei Metre, quar s'eschai Que aion esmai. Ieu dic las qu'eu sei: De las falsas vos dic uei. Mas ges non lur nei Qu'el mal qu'om en trai Son plazer verai A home qui prei Ab tam fi cor com ieu ei. |
Metrical pattern: 627f