| prosody | miscellaneous |
Dels quatre caps que a la cros Ten l'us sus, vas lo fermamen, L'autre vas abis, selh de jos, E l'autre ten vas orien, E l'autre ten vas occiden! E per aital entresenha Que Cristz o a tot en poder. La crotz es lo dreitz gofainos Del rey cuy tot cant es apen, Qu'om deu seguir totas sazos Las suas volontatz fazen. Car qui mais y fay mais y pren E totz homs qu'ap lui se tenha Es segurs de bon loc aver. Cristz mori en la cros per nos E destruis nostra mort moren. E en cros venset l'ergulhos El leinh on vensia la gen, Et en cros obret salvamen, Et en cros renhet e renha, Et en cros nos volc rezemer, Aquest fagz fo meravilhos: Qu'el leinh on pres mortz naissemen Nos nasquet vida e perdos E repaus en loc de tormen! En cros pot trobar veramen Totz homs que querre l'i denha Lo frug del albre de saber. Ad aquest frug em tug somos Que·l culham amorozamen Que frugz es tan bels e tan bos Que qui·l culhira ben ni gen Tostemps aura vida valen! Per qu'om de culhir no·s fenha Mentre qu'en a loc e lezer. Lo dous frug cuelh qui la cros pren E sec Crist vas on que tenha, Que Critz es lo frugz de saber. |
Metrical pattern: 341