prosody | miscellaneous |
Pels cleres es a pellatz herege qui ne jura Segon la lor razon d'engan e de faussura! E tenen per nien la sainta escriptura, Qu'a tota hora menten laidament sens mesura E volen qu'om los trob figlos plens de dreitura. Lor avers es tant grantz que ne-l podent escondre, Mas nuls ne lor demand, que n'i degnent respondre E fugent alcun si ne-l podent raire ho tondre, Peri no se vei qui les honisc'e deshondre Et om les soste quant les deuria confondre. Ieu ja non auzirai quella faussa clergia Que non onren ne Deu ne la vergen Maria Et en ditz et en fatz son pejor cascun dia! Et aquel que les crey ne que en lor se fia Troba-ls voidz de merce e sensa cortesia. Il son plen de folor e d'orguelh e d'ufana Aquest mestre pastor de la gleisa romana. Il son faus e truand vers la gent crestiana. Qui reignet entre lor a volontat trafana E mostran mal labor set jorns de la semmana. Tau mal labor fan tuit en ditz et en parvensa, Aquil gasta-conduitz, figlo de descrezensa, De qui leutatz s'enfuy e vera penitensa: En lor troben reduit tuit mal e mantenensa, E tuit ben son destruit en lor obediensa. |