Main PageTroubadours' ListingMore Works by Peire Cardenal

The prosody guide is available as a book. Click here for details.

Qui volra sirventes auzir
Tescut d'enuech, d'antas mesclat.
A mi-l demant, qu'ieu l'ai filat
E-l sai ben volver et ordir!
E sai ben los malvais cauzir
E conosc ben lur malvestat!
E plazon me-l pros e-l prezat,
E-ls fals e-ls messongiers azir.

Ves clergues deslials me vir,
Car an tot l'ergueil ajostat
E l'engan e la cobeitat,
E homs mas il no sap trair.
E fan ves totas partz auzir
Que raubador sian vedat,
E can qu'il an tout ni emblat
Cap drech van ves l'autar servir.

E auran lomon, can que tir,
Que res non lur n'es amparat!
Qu'il non temon Dieu ni peccat
Ni nul lach estar, far ni dir,
Sol las terras puescan sazir,
Qui-s vuelha n'aira l'uelh mulhat,
Qu'il non an d eren piatat
Mas de lur ventre azumplir.

E fan soven perdon venir
Per los avers que-i son sobrat,
Etz aco es lur ben gardat
Que Dieus ni-homs no'n pot gauzir.
E si'n grat pren Dieus cel servir,
Ben tenc so fort per escampat
Qu'a vestir als paures es dat
Ni a manjar ni a garnir.

E d'aisso vos pot hom partir:
C'aissi com plus aut son prelat
An menz de fe e de feutat
E mais d'engan e de mentir!
E menz en pot hom de ben dir,
Car mais i a de falsetat
E menz de ben e de vertat
E mais d ir.

E menz i pot hom prezumir
De ben ni de nuilla bontat,
Car mais de mal i-es sagellat
E notar ni quartas escrir,
E. . . . . . . . .ir,
E menz prezan Dieu per orat,
E menz i trob'om d'amistat
E mais fan de mals us eissir.

Cavaliers degr'om sebelir
Com jamais d'els non fos parlat,
Car son aunit e deisonrat!
Lur vida val menz de morir
C'a clergues se laisan pestrir,
E per els son dezeretat
E, segon lur dret de barat,
Jujat son de tot a perir.

Ab bauzias volon sazir
Clergue raubant, cant es vacat!
Seinhor del mont son sotzplantat
Sotz els, sel que degran regir!
Carles Martels los sap tenir,
Mas aquest rei conoisson fat
Qu'il fan far de tut a lur grat
E so qu'il degr'onrar, aunir.

De clergues non auzi mal dir:
Car mi poiri 'esser comprat!
Mas il n'an tan trop aquabat
Que-l monz en deuria sonsir.