prosody | miscellaneous |
Un estribot farai, que er mot maistratz, De motz novels e d'al e de divinitatz. --Qu'ieu ai en Dieu crezensa que fon de maire natz, D'una santa pieusela, per que-l mons es salvatz. E es paire e filhs e santa trinitatz, E es en tres personas e una unitatz. E cre que-l cels e-l tros ne fos per el traucatz E'n trabuquet los angels: can los trobet dampnatz. E crey que sans Joans lo tenc entre sos bratz E-l bateget en l'aigua, et flum, can fo propchatz! E conoc be la senha abanchas que fo natz: El ventre de sa maire que-s volvc al destre latz E cre Rom'e sant Peire a cuy fon comandatz Jutge de penedensa, de sen e de foldatz. --Mas so non crezon clergue que fan las falcetatz, Que son larc d'aver penre et escas de bontatz, E son bel per la cara et ore de peccatz, E devedon als autres d'aco que fan lurs atz, E en loc de matinas an us ordes trobatz Que jazon ab putanas tro-l solelhs es levatz, Enans canton baladas e prozels trasgitatz: Abans conquerran Dieu Cayfas o Pilatz. --Monge solon estar dino los mostiers serratz On azoravan Dieu denan las magestatz, E can son en las vilas on an lurs poestatz, Si avetz bela femna o es homs molheratz, El seran cobertor, si-eus peza o si-eus platz! E can el son desus e-l cons es sagelatz Ab las bolas redondas que pendon al matratz, Con las letras son clausas e lo traucs es serratz, D'aqui eyson l'iretge e li essabataz Que juron e renegon e jogon a tres datz: Aiso fan monge negre en loc de caritatz. --Mon estribot fenisc, que es tot compassatz, C'ai trag de gramatica e de divinitatz! E si mal o ai dig, que-m sia perdonatz, Que yeu o dic per Dieu, qu'en sia pus amatz, E per mal estribatz Clergues. |