| |
|||
| prosody | miscellaneous |
Un sirventes novel vueill comensar, Que retrairai al jor del jujamen A sel que-m fes e-m formet de nien. S'el me cuja de ren arazonar E s'el me vol metre en la diablia Ieu li dirai: seinher, merce, non sia Qu'el mal segle tormentiei totz mos ans. E guardas mi, si-us plas, dels tormentans. Tota sa cort farai meravillar Cant auziran lo mieu plaideiamen! Qu'eu dic qu'el fa ves los sieus faillimen Si los cuja delir ni enfernar. Car qui pert so que gazanhar poiria, Per bon dreg a de viutat carestia, Qu'el deu esser dous e multiplicans De retener las armas trespassans. Los diables degra dezeretar Et agra mais d'armas e plus soven, E-l dezeretz plagra a tota gen Et el mezeis pogra s'o perdonar, Car per mon grat trastotz los destruiria, Pos tut sabem c'absolver s'en poiria: Bels seinhers Dieus sias dezeretans Dels enemix enuios e pezans Vostra porta non degras ja vedar, Que sans Peires i pren trop d'aunimen Que n'es portiers: mas que intres rizen Tota arma que lai volgues intrar. Car nuilla cortz non er ja ben complia Que l'uns en plor e que l'autre en ria! E sitot ses sobeirans reis poissans, Si no m'ubres, er vos en fatz demans. Ieu no me vueill de vos dezesperar! Anz ai en vos mon bon esperamen, Que me vaillas a mon trespassamen: Per que deves m'arma e mon cors salvar. E farai vos una bella partia: Que-m tornetz lai don moc lo premier dia O que-m siatz de mos tortz perdonans. Qu'ieu no-ls fora si non fos natz enans. S'ieu ai sai mal et en enfern l'avia, Segon ma fe tortz e peccatz seria, Qu'ieu vos puesc ben esser recastenans Que per un ben ai de mal mil aitans. --Per merce-us prec, donna sancta Maria, C'al vostre fill mi fassas garentia, Si qu'el prenda lo paire e-ls enfans E-ls meta lay on esta sans Johans. |
Play the original melody
Can't hear anything? Click here to download the original melody (MIDI).