Main PageTroubadours' ListingMore Works by Peire Cardenal

The prosody guide is available as a book. Click here for details.

Vera vergena, Maria,
Vera vida, vera fes,
Vera vertatz, vera via,
Vera vertutz, vera res,
Vera maire, ver' amia,
Ver' amors, vera merces:
Per ta vera merce sia
Qu'eret en me tos heres
De patz, si-t plai, dona, traita,
Qu'ab to filh me sia faita

Tu restauriest la follia
Don Adams fon sobrepres,
Tu iest l'estela que guia
Los passans el san paes,
E tu iest l'alba del dia
Don lo tieus flhs solelhs es,
Que-l calfa e clarifia,
Verais, de dreitura ples.
De patz, si-t plai, dona, traita,
Qu'ab to filh me sia faita

Tu fust nada de Suria,
Gentils e paura d'arnes,
Umils e pura e pia
En fatz, en ditz et en pes!
Faita per tal maistria:
Ses totz mals, mas ab totz bes.
Tan fust de doussa paria
Per que Dieus en tu se mes.
De patz, si-t plai, dona, traita.
Qu'ab to filh me sia faita

Aquel que en te se fia,
Ja no-l cal autre defes,
Que sitot lo mons peria
Aquel non perria ges!
Quar als tieus precx s'umilia
L'auzismes, a cui que pes,
E-l tieus filhs non contraria
Ton voler neguna ves.
De patz, si-t plai, dona, traita,
Qu'ab to filh me sia faita

David, en la prophetia
Dis, en un salme que fes,
Qu'al destre de Dieu sezia,
Del rey en la ley promes,
Una reyna qu'avia
Vestirs de var e d'aurfres:
Tu iest elha, ses falhia!
Non o pot vedar plaides.
De patz, si-t plai, dona, traita,
Qu'ab to filh me sia faita

Quar al latz Dieu estas, traita,
Que-m sia patz de luy faita.