| prosody | miscellaneous |
Aissi com hom plainh son fill o son paire O son amic quan mortz lo i a tolgut Plainh ieu los vius qui sai son remazut, Maint deslial, felon e de mal aire, Mensongier, truan, Cobes, de mal plan, Raubador, lairon, Jurador, tiran, Abric de trachors, On diables reinha C'aissi los enseinha Com hom fai enfan E lor met denan So per que Dieus los soan. Tot home plainh quant es glotz e raubaire, E plainh lo fort quan trop o a tengut, E plainh lo fort quar hom non l'a pendut! E plainh lo fort quar es trachers e laire. Non plainh quar morran Mas quar vivon tan Li malvatz gloton, E plainh quar auran Heres sordeiors. Tan fan mal enseinha, Cil cui Dieus esteinha, Que si gaire estan En aissi obran Festa farem quan morran. Tot lo mon plainh, quar es fals o trichaire, E quar son sen a camjat e perdut, Que dels vicis cuion sian vertut E dels mals ben, et es lur a veiaire Que·l pro son blasman, E·l malvatz prezan E li avol bon, E·l tort benestan E l'anta onors. Malfatz los enseinha, Quar non vol qu'om teinha Re que Dieus coman, Mas que cascus an Lai on li deslial van. E plainh quar quecs cuia valenz faitz faire E·s feinh fort francs quan part pron a begut, Mas qui los faitz fazia que fan tut De la valor non calria retraire. Lai cug que·ls engan Le fals cugz que an: Que del fag felon Lor fai ferm semblan Qu'es vera valors. Genz cui Dieus desdeinha, Cuidatz ves vos veinha Bes per mal mazan Ni pros per dar dan De tort fait voletz grat gran. Ar m'es semblans que mos chanz non val gaire, Quar de mal dir l'ai ordit e tescut, Mas de mal fueill non cueill hom leu bon frut Ni d'avol fag bon plag no sai retraire. Dels laitz fatz qu'il fan Laitz ditz dic e chan Josta la razon, E del fel talan Enic dic lo cors: Quar m'es greu qu'eu peinha L'error lor ni feinha, Ni los an lauzan Ni·l chan an dauran, Mas per aital con seran. Mos chantars enseinha De que hom si teinha Ni qual fach soan Cil que a talan De valor e d'onor gran. |
Metrical pattern: unl.