prosody | miscellaneous |
Al nom del senhor dreiturier, Dieus, qu'es senhers de tot quant es E nuills mais el senhers non es, Ai cor de far vers vertadier. Et el do m'en poder que-l mon soste, De far aital pus en coratge-m ve! Car nuills cantars non tanh si'apellatz Vers, si non es vertadiers ves totz latz. Mot non deu aver hufanier En vers, segon sos nons es. Si totz motz adreitz e cortes Met hom en maint chantar leugier, Bels dictatz fis ab castic si cove, E vers, qui-l fa, ab tant dobla son be: Car per bels motz er sos chantars lauzatz E-l casticx es fondemenz de peccatz. Pos tant pot valer castier Ben voill qu'en mon vers sia mes. E no-i aura mais motz mascles, E par me sia lo primier. E fas l'ap joi, car hieu entent e cre C'aissi foron faig li bon fag ancse. Per que totz hom ri per outracuidatz Cant no-s da joi, cant pot estar onratz. En aissi volgra-l plus sobrier D'aver castiar, s'eu pogues, Que non fos avars ni cobes E que-s des joi et alegrier. E volgra fort et chastier metre Que des per Dieu, e que non tolgues re. Mai cant lo rics er d'aisso castiatz, Venra n'Artus, sel qu'enportet lo catz. Non sai si-m m'auran per parlier Li ric, s'ieu dic aizo que n'es, Mas tant hieis de lor pauc de bes Per qu'eu no-i conosc meillurier, S'ieu dic lo ver ho si m'en lais dese. Car so qu'eu dic enten cascuns e ve, E s'ieu dic plus, serai per els blasmatz, E si m'en lais no'n serai plus honratz. Senher Dieus vers, sobre vos non ha re: Et en aissi com es vers hieu ho cre. Datz mi poder qu'eu am so que amatz E que aszir so que vos asziratz. |