| |
|||
| prosody | miscellaneous |
Anc non vi Breton ni Baivier Ni Grec, ni Escot ni Gales Que tant mal entendre fezes Com fai home lag messongier, Qu'a Paris non a latinier --Si vol entendre ni saber Coras ment ni coras ditz ver-- Que devis no l'aia mestier. Qu'entendre non pot hom parlier Can sa paraula non es res, Anz saber pot hom que fals es, Qu'al frug conois om lo fruchier! Aissi com hom sent femorier Al flairar, ses tot lo vezer, Aissi fai lo mentirs parer Lo fals coratge torturier. D'aquels sai ieu un trentenier Que ieu entendre non puesc ges Qual es lor volers ni lor pes, Qu'el parlars no'i val un denier, Ni-l fes no-i fai mas empachier, Que quan juron lo remaner Adoncs volon aillors tener: Per qu'ieu lur sagramen non quier. Tal sai que n'a lo plen jarzier E gieta las en tres e tres, Vint lo jorn e seis cent lo mes, Aissi que l'an son set millier. Anc non vi tan pauc menestier On tan grans res pogues caber, Et aura n'i aitant lo ser Consi no'n issis huei ni ier. Mestral de messonjas obrier, L'aires es purs e francs e fres Tro vos l'avetz el ventre mes Don ieis menten pel fals fumier. E vos, si com fals monedier, Monedatz ab lo fals voler Fals digz, per que devetz aver De la falsa obra fals loguier. Q'ie'n sai un, flac e mal terrier, E fora peier si poges! E si era en gage sa fes No crei la traisses d'un denier. Aqel s'aders d'aital mestier Don pot trop leu far son dever, Sol q'en parlan non diga ver Ni faza nul fag drechurier. Ira m'en don e cossirier, Non pas pel dan que-i dei aver, Mas car li fals cuion valer E-ilh malvatz si fan bobansier. De ric home malastruguier Sai tal c'a pauc m'enten per ver! Car non dic e non fas saber So nom, con de fals torturier. |