| |
|||
| prosody | miscellaneous |
Caritatz es en tan bel estamen Que Pietatz la resein e la clau, Vertatz la vol, Dreitura la conjau, Merces la te e Paz la vai seguen, Poders la defen, Sabers lhi es amics E Bontatz abrics, Sus, el grat ausor, Ab lo Diu d'amor, Cui esperitz armatz ve Ab los clars hueilhs de la fe. E sainz es Tortz que ab Dreg conten, Et es Mentirs qui sec Tort per l'esclau, Et an Engan e Bauzia e Frau, E Cobeitat et Ergueilh eissamen: De lor parlamen Sailh us fals prezics Que conorta-ls rics Et enseinha lor Que sian trachor E de malvestat tut ple, Tro que la mortz los enme. Dretz dis a totz que vivan justamen Que Tortz si pert pert egal que-ls bens clau! E Tortz respon: aquo que lur abau Que-il tieu son paubre e li mieu son manen Dretz dis que qui men Es sos enemics! Tortz dis: si t'en gics Non auras ricor. Dretz dis: c'on labor Et aura honor e be! Tortz dis: c'on non l'en lais re. Tortz dis als sieus que-s gardon a presen, Qu'om non val re si l'aver non enclau! Et Dretz respon: aquel que Dieu non au, Dieus non au lui ni sos precs non enten. Tortz dis que qui pren Es savis e rics! Dretz dis: non t'afics En aital folor. Tortz dis que honor Ha major qui mais rete! Dretz dis: non a ges ses me. La gran folor del mon Tortz ten a sen E a folor lo sen qu'ab Dieu se clau. E-l dous voler de Dieu, Tortz ten a brau E cel del mon a dous e a plazen. Mas Dretz l'en repren E dis qu'als enics Es l'enanz destrics, Que-l ris torn' en plor E-l jois en dolor, E-l grans poders en non re E-l fols non sap vas on te. A bel amador Que a bell' amor Qu'a donat son cor e se Ai donat mon cor e me. |