prosody | miscellaneous |
Clergia non valc anc mais tan: Qu'ill solon anar prezicant, Mas eras van peiras lansan A l'autra gen, E tenon per pus publican Sel que-s defen. Cavalier solion jostar, Ar an meillurat lur afar: De mentir e de-s perjurar Se son garnit, E so que solion donar Porton vestit. Domneis es meilluratz molt fort: Qu'el donava az home la mort Anz qu'en agues joi' ni deport Ni fos volgutz! Ez ar, sol que deniers aport, Mais er que drutz. Vilan non solon aver sen Mas de laborar solamen! Ar son veziat e saben E jaubardel Ez, en plaich, enan sagramen Queron libel. Ieu non sai de neguna lei, De totas quantas vistas n'ei Qu'ab baratas ez ab bufei Lo mais non an, E non get de negun endrei Petit ni gran. Mas be sapcha chascun qu'eu crei Que mil aitan Grazis Deus faitz, quan son cortei, Que malestan. |