Main PageTroubadours' ListingMore Works by Peire Cardenal

The prosody guide is available as a book. Click here for details.

De sirventes faire no-m tueill
E dirai vos razon per que!
Qar azir Tort, aissi com sueill
Et am Dreg, si con fis ancse.
E qui qu'aia autre tezor,
Ieu ai leialtat en mon cor,
Tan qu'enemic m'en son li desleial,
E si per so m'aziron, no m'en cal.

On plus d'omes vezon miei hueill
E mens pretz las gens e mais me,
Et on plus los siec pietz lur vueill,
Et on mais los aug meins los cre,
Et on plus intr'en lor demor
Mens ai de plazer en mon cor!
Que s'ieu pogues viure de mon captal
Ja non volgra sezer a lor fogal.

Dels ricx malvatz barons mi dueill
Quar son tan de malvestat ple!
Mal m'es que la mortz no-ls acueill,
E pietz quar vida los soste,
E mal m'es, qan malvatz hom mor,
Car la malvestatz qu'a el cor
Non mor ab el tot ensems per egal,
Que non restes ab son fill a l'ostal.

Manta carta vei e mant fueill
On trop escrig que si conte:
Que hom azir tort et ergueilh
E laisse-l mal e fassa-l be!
Mas trastotz lo mons d'or en or
A virat l'al re en son cor:
Que hom laisse lo ben e fassa-l mal
E-l dreg azir et am lo tort mortal.

Ben camja civada per jueill
E tiriaca per vere
Et anguila per anedueill
Qui laissa Dieu per auol re.
Tant vai trassios a vil for
Que si l'hom que plus n'a el cor
La trazia en ple marcat venal
No-l daria hom mezalha del quintal.

Trachor, si vos triga, no-us mor
Que-l malvestatz qu'avetz al cor
No vos mene a fort malvat ostal:
Qu'anc non fon us que non anes a mal.