prosody | miscellaneous |
De sirventes sueilh servir Sai sus on eron volgut! Don ai manz vils vols tolgut Per far fals fatz escarnir E que hom ves valor vir. E si per so plas als pros Pro m'es pros. Qar tos temps dezir Qu'om pros m'am, qui que m'azir. En fers fatz fai afortir Lo monz cels que i son nascut! Que qant an queacon viscut, Quecx fai que crois ab murtrir Ab tort far et ab mentir, Qu'en dos meilhiers non a dos Qu'ab dretz dos Vueilhon avenir Lai on hom dous deu venir E quan vida-l vol faillir, Cuida far vera vertut Qan diz qu'il seu aver tut Sion dat al sebelhir, Qu'estiers no-l pot abelhir Donars, tan es cobeitos E coitos D'aver aculhir, Tro mortz vai lui reculhir. Dieus deu als baros grazir Qar ves lui son sort e mut! Que-l luoc on fom rezemut Non volun tan possezir Con l'autrui terra sazir. E non crei que-l reis n'Anfos Aitals fos, Anz volc envazir Turcs per crestians aizir. Malvestat vei espandir Vas totas partz a sauput Que-l mon a tot corromput, Que gaire non es a dir. Qar qui o auzava dir, Neir e blanc e brun e ros An tan ros Que qan los remir, Dolors m'en ven aramir. Un non trop en mil garsos Que gar sos, Anz volon bordir De cansos falabordir. |