Main PageTroubadours' ListingMore Works by Peire Cardenal

The prosody guide is available as a book. Click here for details.

D'un sirventes far soi aders
Merce Dieu e de mos vezis,
Que de Dieu me ven lo sabers
E-l razos dels baros meschis,
Paures d'amor e de feunia rix,
Sors en ergueil, e valor dechazeitz,
Amicx de tort e de Dieu enemix.

Mal lor di hom, mas lo es vers
Qui los apella querentis
Ni renoviers d'autrui avers
Ni raubadors d'autrui camis,
Trebails dels bos e dels lairos abrix,
Cautz de tort far e de caritat freitz,
Ricx en raubar et en donar mendix.

Lor pezars es lo mieus plasers
E lor plorars es lo mieus ris,
Qu'atretant me plai lo volers
D'un lop o d'una calcatris!
Car, si liges entr'els libres antix,
Vos trobares de lops aitan adreitz
Que n'an passat manz fals baros enix.

D'els non vai segurs laics ni clercs
Ni monges niers ni blancs ni gris.
Que bels manjars ni bels jazers
L'oste ni l'ostal non garis,
Si lai a draps ni astz ni pals ni pix!
Que al levar s'en van ab los espleitz,
So que non fes en lobatz ni'n urtix.

Ben sai que terra ni avers
No met son don en paradis,
Ni grans tezaurs ni grans poders
Non salva'l ric ni l'asantis.
Car l'enansars de sai es lai destrix,
Can l'arma sec lai los camis estreitz
E-l cors es sai vianda dels lonbrix.

Sapchas, mals homs, si de tort far no-t gix,
Tan non penras ni de dons ni d'espleitz
Que tu non ans a mal, quan que o trix.