| |
|||
| prosody | miscellaneous |
Ieu trazi pietz que si portava chieira Quan vei far mal a la gen ni grevansa. E non aus dir que tortz es e sobrieira Tan tem l'erguelh del mon e la bobansa, Mas d'una ren mi conort a sazos: Que Dieu es tan cortes e poderos Que dels tortz faitz cug que penra venjansa. Hom Dieu temenz non aura leu nessieira. E-l non temenz aura greu aondansa, Que l'us es larcs en mieg de sa paubrieira, L'autr'es avars en sa meilhor estansa: Que on plus a e plus es cobeitos, E cobeitatz fai lo tant enveios Que non auria pro ab tota Fransa. Si avetz d'aur una plena ribieira E non avetz amor ni acoindansa Ab Dieu ni ab gent de bona manieira, Ja non auretz deliey ni benanansa, Que granz avers ten son don cossiros E bon' amors alegre e joios, Que-l rics s'irais mentre l'amoros dansa. Ieu laus e pretz bon' amor drechurieira Ab cortes faitz et ab bell' esperansa, Non ges amor falsa ni mensongieira Que-l derriers caps repren la comensansa, Aquel' amor que notz als amoros, Que, on mais serv, menz val lo guizerdos, Amor que merma on mais si enansa. Qui vol aver fina valor entieira Aia ab Dieu amor et acordansa E veia ben ez esgart ez enquieira De quals afars a plazer o pezansa, E segua-ls bos e lais los enoios! Qu'en aissi pot esser valenz e pros, Qu'om non es ges valens per sol sa lansa. Per pro tener es hom apellatz pros E per valer valenz, et es razos. Mais val qui serv que qui traucava pansa. |