Main PageTroubadours' ListingMore Works by Peire Cardenal

The prosody guide is available as a book. Click here for details.

Las amairitz, qui encolpar las vol
Si razonon a for d'en Isengri:
L'una fai drut quar esta'n grant aujol,
L'autra lo fai quar paubreira l'auci!
L'una a vieil marit e es tozet
L'autra es granz e a pauc garsi
L'una non a sobrecot de bruneta
L'autra n'a dos e fai lo atressi.

Prop a guerra qui l'a en mieg son sol,
Mas plus prop l'a qui l'a a son coissi.
Can lo maritz a la moiller fai dol,
So es guerra peior que de vezi,
Qu'ieu en sai tal que, s'era part Toleta,
Non a moiller ni paren ni cozi
Que ja disses: que Dieu sai lo trameta.
Mas, can s'en vai, lo plus iratz s'en ri.

S'us paubres homs a emblat un lensol,
Laire es clamatz ez anara cap cli,
E s'us ricx homs a emblat mercuirol,
Ira cap dreg en la cort Costanti!
E si-l paubres a emblat una veta,
Pendra lo tals q'a emblat un ronci.
Aquest dretz es plus dretz c'una sageta
Que-l laire penda-l lairo mesqui.

Gran festa fai mas ges ben no la col
Qui buous emblatz ni moutons i auci.
Qu'ieu en sai tal que n'umpli son pairol.
Lai a Nadal, mas non voill dire qui.
Aco es carnz que non pot esser neta,
Carnz desleials que la lei contradi.
Mens a de sen non a l'enfans que teta
Qui cuia honrar calendas enaissi.

A mos ops chant e a mos ops flaujol,
Car homs mas ieu non enten mon lati!
Atretan pauc com fa d'un rossinhol
Entent la gent de mon chant que se di.
Ez ieu non ai lengua fiza ni breta
Ni sai parlear flamenc ni angevi,
Mas malvestatz que los escalafeta
Lor tol vezer que es fals ni es fi.

A mi non cal que crois hom s'entrameta
De mon chantar pos siei fag son porsi.