| prosody | miscellaneous |
Lo mons es aitals tornatz Que-ls fatz governa poders E las paraulas volers E-ls pensamens vanitatz E falseza-ls senz E los cors abellimenz: Que drechura ni vertatz Non governon mais agratz, Anz son ses dever Li fach e-l dich e-l voler. Si tolres fos caritatz E si messonja fos vers E si pezars fos plazers Et ergueills humilitatz E tortz chauzimenz Et enois enseinhamenz E malvolers amistatz, Assaz son de pozestatz Que pogran caber Ab Dieu per aital poder. Mas aquil fatz es passatz Que, tolen autruis avers Ni derauban laics e clers, Ni prenen las eretatz Ni cassan las genz, Nin es hom a Dieu plazenz Ni sainz ni benauratz! Anz es fols e dessenatz Qui cuia valer Per tals fatz a mantener. Can tortz e deslealtatz Son ensems e non-devers, I deu esser mals espers, Car aitals es lo mercatz Quez als destruenz Deu venir destruimenz E drechs no'n es encolpatz: Quan merses ni pietatz No-i pot pron tener, Lai vai drech tortz decazer. Dieus e bona voluntatz Garnis lis pros e-ls aders De vertutz e de sabers E de valenz fatz onratz, E-ls fai entendenz E cortes e conoissenz E larcs e gent enseinhatz, E amoros e privatz Que puescan plazer A lui qan los vol aver. Et es ben desazesmatz Qui non vol valer, Sivals ab sol lo voler. |