prosody | miscellaneous |
Predicator Tenc per meillor, Quam fai l'obra que manda far, Non fas selui Que l'obra fai Que als autres vai predicar. Qui en predic Met son afic Lo fach e-l dich deu ajostar, Car meils lo cre Aquel que-l ve Son predic per l'obra mostrar. Ar escoutat, Per eus vostre at, E non vos grev al comensar Que, a derrier, D'autre Gautier Cug que m'auzires violar. Ieu ai en cor Que, per demor Ni per rire ni per jogar, No-us diga huei Mal ni enuei, De guiza que-us deia pezar No-us dirai ren Mas sol per ben E per obs e per esmendar, E s'ie-us repren Adrechamen No m'o deves a mal tornar. Que son enfan Bat hom enan E-il castia sos malestar Non fai l'estrain, De cui no-l tain Si-l vezia peiras lansar. Me tain de vos, Per qu'es razos Que vos castic, si o sai far, Mas no m'a at, Que n'ai tal grat Com a, de rascas, penchenar. Con plus vos dic E plus m'afic En vos, castian, enseinhar, Vos fest pejor: Per c'ai paor Que m'en covenga a laisar, C'aitan si pert Qui en dezert Semena fromen ses arar Ni en chalmeil Espan son meil: Non sap gaire de laorar. Qui vaissel plen D'alcuna ren Cuia emplir en nou voidar, Petit en sap, Que plus no-i cap Si so que-i es non vol gitar. Vos, ses vaissel Cortes e bel, Que ren no i cal meillurar: Mas car ses ple De tan vil re Don farias ben a semar, Semar vos voilh De gran orgoilh Que-us fa conbatre e rainar, De cobeitat Don ses enflat Que-us fa mentir e prejurar, De mala fe Don ses tan ple Que l'uns no-s fiza en son par, De totz los mals Ques a hom fals Que mostran via d'enganar. Voill vos gardes, Pois apenres La qual via deu tener bar, Car de cusso Tro a baro A longa via az anar. Mas per aver, No-s desesper Paures hom ni aco non guar, Que no-i fai re, Segon qu'ieu cre, Mas sol la via empaitar. Vers es c'argens E garnimens Fan de cusson baron semblar, Mas tot es fals, Que desleials Escutz es ab lo mantel var. Tals a vestit Drap de samit E pot be gran aver mandar, Que ges no-l do Nom de baro, Quan li vei malvestat menar. E tals es nus, Que non a plus C'aquel c'om porta bateiar: Sol car es pros E-il plas razos, Lo deu hom baron apellar. Per que vos quier Que drechurier Siatz e voillatz gazanhar Nom de baro, Gardan razo On plus fort la poires gardar. Digas vertatz Merce obratz Ab donar et ab albergar La paura gen, Car li manen Devon los paures arezar. E sias dous E piatous! Non vos doptes abandonar A caritatz Car, so sapchatz, Non i pot hom mal mercadar. Sias umil, Si c'al plus vil Sufratz que-us puesca foleiar Si cors li-n ve: Pueis trop merce Si la vos denha demandar Perdonatz leu, Vengatz vos greu, E non vos cal cheira portar! Amas amix E enemix, E no-us cal anar outra mar. Ja hom cochos Non torn de vos Ses conseil, si li podes dar, C'aissi cove C'om greuge se Per los autres en aizinar. Car hom non a Valor en va, Ans la li coven a comprar De son aver, De son saber, De son conseil, de son parlar. Tot son esfors D'arm'e de cors, Deu hom metre en Dieu amar! Pueis am la gen Tot eissamen Com se, e no-i cal ren glozar. Sapes cals es Pros e cortes E cal deu hom baron clamar Aquel que fai So qu'a Dieu plai E si garda de son pezar. E sabes cals Es homs leials E cals pot leial anar Qui la lei cre E la lei te E segon la lei vol obrar. Qui aisso fai Ab Dieu s'en vai, Que res non li o pot vedar, E-l guizardons Sera plus bons C'om no pot dire ni pensar. Qui pros sera Pro si aura, E qui volra la lei gardar Es la leis lui, Si c'anbedui Cascuns er garda de son par. Et ab aitan, Anem enan E laissen lo sermon estar! Qui ben fara Ben trobara! Per c'om di: que cascuns si gar. |