Main PageTroubadours' ListingMore Works by Peire Cardenal

The prosody guide is available as a book. Click here for details.

Qui vol aver
Fina valor entieira,
Ab dire ver
Et ab drech far la quieira,
Ab pron tener
Lai on sera nessieira,
Car per valer
Es hom valens a tieira,
E cuion cen
Essen valen
Que-us non sap la fieira
On hom la valor ven.

No-us cuges pas
Valors veigna de bada,
Mantas ves car comprada!
Mas li malvas
No-n compron denairada,
Qu'enanz son las
De la meia jornada.
Donan, meten,
Plazers fazen
Es valors acampada
E malvestatz tolen.

Grans ergueilhs es
E grans desconoissensa
Qui-s fenh cortes
E non fai captenensa!
Lai on merces
Non fai frug ni semensa
Ni negus bes
En lui non pren naissensa.
Pauc a de sen
Qui per nien
Cuid'esser de valensa
E no-i fai bastimen.

Bastimen fai
E valensa enmurat
Sel qui s'atrai
Ab valor e s'atura,
Cui vertatz plai
E merces e drechura,
E sai e lai
Sec razon e mesura.
Mas tan dolen
A en la gen
Que d'aiso non an cura
Per que valors deissen.

Deissen valors
E dechai cascun dia,
Ez enguanz sors
E creis e multiplia!
E mor amors
El mon e nais feunia,
Et es lauzors
Blasmes e senz folia!
E sel que men
Ad essien
E trais e gualia,
Renha saviamen.

E qui se ren
En tal coven
Ges ieu la foldat mia
Non vueilh dar pel sieu sen.