Main PageTroubadours' ListingMore Works by Peire Cardenal

The prosody guide is available as a book. Click here for details.

Ricx homs que greu dis vertat e leu men,
E greu vol patz e leu mou ocaizon,
E dona greu e leu vol c'om li don,
E greu fa ben e leu destrui la gen,
E greu es bons e leu es mals als bos,
E greu es francx e leu es erguelhos,
E greu es larcx e leu tol e greu ren,
Deu cazer leu d'aut luoc en bas estatge.

De tals en sai que pisson a prezen
Ez a beure s'escondon dinz maizon,
Ez a manjar non queron compaignon
Ez a taillar queron en mais de cen,
Ez a l'ostal son caitiu e renos
Ez a tort far son ric e poderos,
Ez a donar son de petit paren
Ez a tolre fort e de gran paratge.

Malditz es homs que-l ben ve e-l mal pren,
Ez il an pres enguan e trassion
Ez an laissat conduch e mession,
Ez an pres far dan e destruimen
Ez an laissat vers e lais e cansos,
Ez an pres placz e rainas e tensos
Ez an laissat amor e fag valen,
Ez an pres mal voler e far outratge.

Aissi con son major an peior sen,
Ab mais de tort ez ab menz de razon,
Ab mais de dan tener, ab menz de pron,
Ab mais d'erguelh, ab mens de cauzimen,
Ab mais de tolre ez ab menz de far dos,
Ab mais de mals, ab menz de bels respos,
Ab mais d'enueg, ab menz d'ensenhamen,
Ab mais d'enguan, ab mais de franc coratge.

Ara-m diguas, segon lo vostre escien,
De dos senhors cals a meillur razon,
Que l'uns dels dos pot dar e tolre non,
E l'autre pot tolre e dar nien.
Ar diran maint que-l dars val per un dos,
E veires los tolre totas sazos!
A que far doncx van emblan ni tolen,
Pos lo donars a dos tanz d'avantatge

Mos cantars es enuech als enuios
E als plazens plazers cui plas razos.
Tuch li dich son enuios e plazen:
So plas als uns qu'als autres es salvatge.