Main PageTroubadours' ListingMore Works by Peire Cardenal

The prosody guide is available as a book. Click here for details.

Totz lo mons es vestitz e abarratz
De falsetat, e tot jorn vai creissen
Tant d'or en or que n'es sobreversatz,
E-l sobrevers non pren nuil mermamen.
Que-l genz estan malveziadamen,
Que no portan l'uns a l'autre fizansa,
E cobeitatz amorta amistansa
Et enveja adus hom en talen
D'aco d'autrui, en que non a nien.

Ieu non trop fons don iesca lealtatz
Pres ni valors, aissi-m sal Dieus mon sen,
Mas pron trop fons don ieis delialtatz:
Don ja per cert non penra perimen.
Qu'enanz defail sel que viu lealmen
Que sel qu'esta totz jorns e malestansa.
Ab pauc no-m part de Dieu mal'esperansa,
Pos que-l fals son abastat e manen.
Mas ieu non cre que si' a Dieu plazen.

Ben tenc per fols sels e per non senatz
Que non estan honest-e lialmen.
Si-l deslials era per nos amatz,
Bel seihners Dieus, motz auriam pauc de sen.
Car sel qu'estan confes e peneden,
D'aquels cre ben que n'auran benanansa
En paradis, e-ls fals la malanansa
Del foc d'ifern cremara veramen.
S'ieu non dic ver, doncx l'escriptura men.

Si abastes en aissi lealtatz
Coma defail, ja non fora plazen
Als diables, anz en foran iratz,
Si que jamais dedinz en lur coven
Non intrara nuill arma sertamen.
Mas non lur cal aver nuilla duptansa
Que ja mora engans ni malestansa
Per gran eissuch ni per frech ni per ven,
Car ab totz pren razis e noirimen.

Pauc son, d'aquels c'om vei, enrazigatz
En drechura ni en bon estamen,
E feinhon s'en guanren que son malvatz,
E son plus fals que non fan aparven.
Aquel feinhers es a decebemen
De las armas que perdon alegransa!
Et en clergues es aquella uzansa
Que si fan bons, mas Dieus sap l'estamen
Dels fals clergues e dels laics eissamen.

A trastotz prec que pregon coralmen
Dieu Jhesu Crist que don lai alegransa
A N'Audoard, quar es la meilher lansa
De tot lo mon, e don cor e talen
Al rei Phelipp que-l secorra breumen.

De mi ti part, sirventes, e vai t-en
A mon seinhor, on valors pren onransa--
Nomnar lo t'ai, car mielz n'auras menbransa--
Lo rei Jacme, c'om ten per tan valen
Que sap non re far pus entieiramen.