prosody | miscellaneous |
Totz lo sabers del segle es foudatz! E Dieus dis o e trobam o ligen! Et ieu cre ben sos ditz veraiamen: Qu'ieu vei que-l ricx es savis apellatz E-l paupres es fols e caitius clarmatz. Al ric parec, del segle traspassan, Et al Lazer, cal mes Dieus en soan. La riqueza del segle es paubretatz A sel que l'a conquista malamen, Qu'el en pert Dieu e l'arma eissamen, E ren no-i a pueis que es traspassatz, Et es plus fols que trichaires de datz Qui per aver gieta Dieu a son dan Ni per onor que malamen guazan. Ges paupres hom non deu esser cassatz, C'atressi a sen et entendemen Con a lo ricx e razon eissamen, E trobar n'es de ben aconseillatz, E si el es en conseil apellatz, El lo dara lial e ses enguan E qui-l creira no i poira aver dan. Mas tant es grans del segle-l cobeitatz Que nuils non ve son dan ni non l'enten, E l'enveja es tan grans de la gen D'aver maizons, terras et eretatz Qu'a guiza d'orbs si gieton els baratz, E can vezon que-l baratz vai montan Empenhon si ades mais azenan. Sel que volra de Dieus esser amatz Aia en si leial entendemen, Et ajoste so qu'aura leialmen, Et fassa ben als paupres dezaizatz, Qu'el mandamenz nos fon aitals donatz. E qui non a-l poder aia-l talan, Que-l volontatz venra a Dieu denan. Maire de Dieu, siatz de mi membran Lai on seran jujat li pauc e-l gran. |