Main PageTroubadours' ListingMore Works by Peire Rogier

The prosody guide is available as a book. Click here for details.

Per far esbaudir mos uezis,
Que-s fan irat quar ieu no chan,
No mudarai deserenan,
Qu'ieu no despley
Un so nouelh, que-ls esbaudey!
E chant mais per mon Tort-n'auetz,
Quar trop dechai
Tot quan uey sai,
Mas lai ab lieys creys ioys e pretz,
Per que-l sieus conortz m'es plus bos
Que tot quan uey far entre nos.

De midons ai lo guap e-l ris
E suy fols, si plus li deman,
Ans dey auer gran ioy d'aitan!
A dieu m'autrey--
Non ai donc pro, quar sol la uey--
Del uezer suy ieu bautz e letz,
Plus no m'eschai,
Que ben o say,
Mas d'aitan n'ai ieu ioy e pretz
E m'en fauc ricautz a sazos
A guiza de paubr'ergulhos.

De totz drutz suy ieu lo plus fis,
Qu'a midons no dic re ni man
Ni-l quier gen fait ni bel semblan!
Cum qu'ilh m'estey,
Sos drutz suy et ab lieys dompney
Totz celatz e cubertz e quetz,
Qu'ilh no sap lay
Lo ben que-m fai,
Ni cum ai per lieys ioy e pretz!
Ni-s tanh que ia-l sapch' enuios,
Qu'ieu suy sai sos drutz en rescos.

Anc ieu ni autre no-lh o dis,
Ni elha non saup mon talan,
Mas a celat l'am atretan--
Fe qu'ieu li dey--
Cum s'agues fait son drut de mey!
Re no-m qual, que ia l'am eis setz--
Doncs amarai
So qu'ieu non ai--
Oc, qu'eyssamen n'ay ioy e pretz
E son alegres e ioyos,
Quant res non es, cum si uers fos.

Per s'amor uiu, e se-n moris,
Qu'om disses qu'ieu fos mortz aman,
Fait m'agr'amors honor tan gran,
Qu'ieu say e crey
Qu'anc a nulh drut maior non fey!
Vos jutgatz, dompna, e destrenhetz
Car s'ieu m'esmay
E si mal tray
Ni muer per uos, ioys m'es e pretz:
De uos m'es totz mals bes, dans pros,
Foldatz sens, tortz dregz e razos.

Ieu mai que mai
Ma donn' ieu sai
Que uos mi donatz ioy e pretz!
E uuelh mais morir ad estros
Ia-l sapcha negus hom mas uos.

Bastart, tu uay
E porta-m lay
Mon sonet a mon Tort-n'auetz!
E di-m a n'Aimeric lo tos
Membre-lh dont es e sia pros.