Main PageTroubadours' ListingMore Works by Peire Rogier

The prosody guide is available as a book. Click here for details.

Non sai do chant, e chantars plagra-m fort,
Si saubes don, mas de re no-m sent be,
Et es greus chans, quant hom no sap de que!--
Mas adoncx par qu'om a natural sen
Quan sap son dan ab gen passar suffrir,
Quar no-s deu hom per ben trop esiauzir,
Ni ia per mal hom trop no-s desesper.--

Mas tot quant es s'aclina uas la mort,
Que prezas tu tot quan fas ieu no re!--
Mas so ditz hom, qu'auols es qui-s recre,
Per qu'om deu far tan gen contenemen,
Que no-l puesc' hom mal dir ni escarnir!
Per so dic ieu que no-s deu hom giquir
Aissi del tot, qui-l segle uol tener.

Fort estai be qu'om chant e que-s deport.--
Oc, quan n'es luecx ni temps que s'esdeue.--
E quoras doncx uols o dir ges per me--
Sapchas qu'ieu hoc, quar us grans dols m'en pren,
Quar ditz totz iorns que rir uols e bordir,
Tol te d'aisso, ia t'er tost a morir.--
E laissarai per so mon ioy-auer

Si ioy non ai, don aurai doncx confort--
E qual ioy quiers--de lieys cuy clam merce.--
Folhs yest.--per que--per dieu, trebalhas te,
Ni per aquo...--fai doncx--mas per nien
Te-n entremetz.--tu que saps--aug lo dir.--
Saps tu que--fai--laissa me tot guerir.--
Ieu uoluntiers, e fai tot ton plazer.--

Tost uenra temps, que conostra son tort.--
Aqui t'aten.--si fatz ieu per ma fe.--
Fas ton talan, mas ieu non cug ni cre
Tan quan uiuras n'ayas nulh iauzimen.--
Non dis per als, mas quar m'en uols partir.--
Ieu hoc, per so quar no t'en uey iauzir.--
E ia saps tu qu'als non ai en poder.

Mos cors no-m ditz qu'ieu ab autra m'acort.--
Quar ben as dreg pel gran ben, que t'en ue.--
El' o fara.--e quoras--erasse.--
Ben estara si uers es, mas si-t men,
Tu que-n faras--am mai lo sieu mentir
Qu'autra uertat.--mal hi saubist cauzir,
Qu'ieu non pretz ren mesorgua contra uer.

Per s'amor uiu, e s'amors m'a estort
De la preizon, e s'amors m'a mes fre,
Que no-m eslays uas autra, si-m rete!
E per s'amor ai tot mon cor iauzen,
E-m part d'enueg, e-m platz quan puesc seruir,
E ualon mais de lieys li lonc dezir
Que s'auia d'autra tot mon uoler.

Lo uers tramet e uuelh que si prezen
Mon Tort-n'auetz, si-l play que-l denh auzir,
Que totz lo mons li deuri' obezir,
Quar mai que tot uol bon pretz mantener.

E si dons Santz m'a fag descauzimen,
Mieus es lo dans et er lo-m a sofrir,
Et el no-s poc de plus enuilanir,
E per uilan lo deu hom ben tener.