| prosody | miscellaneous |
Entr'ir' e ioy m'an si deuis, Qu'ira-m tolh maniar e dormir, E ioys mi fai rir' e bordir! Mas l'ira-m pass'al bon conort, E-l ioys rema, don suy iauzens Per un'amor qu'ieu am e uuelh. Dompn'ay.--non ay.-- ia.n suy ieu fis-- No suy, quar no m'en puesc iauzir.-- Tot m'en iauzirai, quan que tir.-- Oc, ben leu, mas sempre n'a tort.-- Tort n'a qu'ai dig boca, tu mens E dis contra midons erguelh. Bona dompna, per que m'aucis-- Ara-m podetz auzir mentir, Que re no-m fai per que m'azir.-- Non re, si m'a per pauc tot mort-- Ben suy folhs e fatz es mos sens, Quar ia dic so per que la-m tuelh. Molt am selieys que m'a conquis.-- Et elha me--oc, so l'au dir.-- Creirai son dig senes pleuir-- Oc ben, ab sol que-l fagz s'acort, E m'atenda totz mos couens E qu'ieu n'aya plus qu'ieu no suelh. Per lieys aic ieu ioy, ioc e ris, Mas ara-n planh, plor e sospir! E-l mals, que m'es greus a sufrir, Torna-m a doble en deport! Pauc pretz lo mal que-l bes o uens, Que plus m'en ri que no m'en duelh. De luenh li suy propdas uezis, Qu'amicx non pot nulhs hom partir, Si-l cor se uolon cossentir! Tot m'es bon quant hom m'en aport, Mais am quan cor de lai lo uens, Que d'autra si pres si m'acuelh. Ja no dira hom, qu'anc la uis, Que tan belha-n pogues chauzir, Qu'om no la ue que no s'i mir! E sa beutaz resplan tan fort, Nuegz n'esdeue iorns clars e gens A selh que l'esgard' ab dreyt huelh. Lo uers uuelh qu'om midons me port, E que-l sia conortamens, Tro que-ns esguardem de dreyt huelh. |