Main PageTroubadours' ListingMore Works by Peire Vidal

The prosody guide is available as a book. Click here for details.

Be m'agrada la covinens sazos
Et agrada.m lo cortes temps d'estiu
Et agrado.m l'auzel, quan canton piu,
Et agrado.m floretas per boissos
Et agrada.m tot so qu'als adregz platz
Et agrada.m mil tans lo bels solatz:
Don per mon grat jauzirai lai breumen,
On de bon grat paus mon cor e mon sen.

Amors mi te jauzen e deleitos,
Amors mi ten en son dous recaliu,
Amors mi ten gallart et esforciu,
Per amor sui pessius e cossiros!
Per amor sui ta fort enamoratz,
Que d'amor son totas mas voluntatz,
Per amor am cortezi'e joven,
Quar d'amor son mei fag e mei parven.

Bel m'es, bella domna, quan pes de vos,
E bel, quar sui en vostre senhoriu,
Bel m'es, quan n'aug bon pretz nominatiu,
E bel, quan vei vostras bellas faissos.
Bel m'es, quan gart vostras finas beutatz,
E bel, quar sui de vos enamoratz,
Bel m'es, quar ai en vos mon pessamen,
E bel, quar am vos sola solamen.

Dieus vos sal, dona, quar etz bell'e pros,
Mas ja no sal sels que son mal mescliu,
E Dieus sal me, quar vas vos m'umiliu,
Mas ja no sal lauzengiers ni gilos.
Dieus sal los pros e.ls adregs e.ls prezatz,
Mas ja no sal los enoios malvatz,
Dieus sal fin drut, que ama finamen,
Mas ja non sal sel qu'ad enoi se pren.

Dona, tan sui de vos vezer cochos,
Dona, que d'als non ai mon cor pensiu,
Dona, quar vos mi podetz far caitiu,
Don', e, si.us platz, plus ric que.l rei N'Amfos.
Bona dona, tant fort m'apoderatz,
Dona, que d'als non es ma voluntatz!
Doma, si.us platz, ajatz n'esgardamen,
Doma, de tan que n'ajatz chauzimen.

Fis gaugz entiers plazens et amoros,
Ab vos es gaugz per que totz bes reviu,
E non a gaug el mon tan agradiu,
Que.l vostre gaugz fa.l segle tot joios.
Ab vos nais gaugz e creis devas totz latz,
Per qu'ieu n'ai gaug e mos bels Chastiatz,
E.m fai gran gaug sel que.m mentau soven
Lo gaug de vos e.l bel captenemen.