Main PageTroubadours' ListingMore Works by Peire Vidal

The prosody guide is available as a book. Click here for details.

Mout es bona terr'Espanha
E.l rei, qui senhor en so,
Dous e car e franc e bo
E de corteza companha!
E si i a d'autres baros,
Mout avinens e mout pros,
De sen e de conoissensa
E de faitz e de parvensa.

Per que.m platz qu'entr'els remanha
En l'emperial reyo,
Quar ses tota contenso
Mi rete gent e.m gazanha
Reis emperaires N'Anfos,
Per cui Jovens es joyos,
Quez el mon non a valensa,
Que sa valors no la vensa.

Fach ai l'obra de l'aranha
E la muza del Breto!
Per qu'ieu mezeis no sai co
M'en rancur ni m'en complanha,
Que.l ver dir m'es angoissos
E.l mentir no m'es nuls pros:
Daus totas partz truep falhensa
En la sua benvolensa.

Mout m'a tengut en greu lanha,
Quar l'ai servid'en perdo!
E servirs ses gazardo
Crei que chaptals en sofranha!
Que vielhs, paubres, sofrachos,
Venc entre.ls rics, vergoghos:
Per qu'om deu sercar garensa,
Ans que torn en decazensa.

E pus ma dona m'estranha
De so que no.l platz que.m do
S'amor, tart veirai Orgo
Ni.l rial castell d'Albanha.
E ja tan pauc orgulhos
Amic ni tan amoros
Non auran mais part Durensa
En la terra de Proensa.