Main PageTroubadours' ListingMore Works by Peire Vidal

The prosody guide is available as a book. Click here for details.

Bels Amics cars, ven s'en ves vos estius,
Qu'entorn Nadal vos tramet de sas flors,
E venz febrier, qu'es ja tornatz pascors,
E fug iverns que no.us es agradius.
Doncs pus li temps son al vostre voler,
Ben es chaitius e ben vol dechazer
Selh que no.us sap honrar e car tener.

Mas mi platz tan vostre rics senhorius,
Que quant aug dir de vos bonas lauzors,
Aissi m'es gaugz e delietz e sabors
Cum als auzells, quant s'alegron pels nius
Del cortes temps que vezon aparer!
E vuelh vos tan, bels Amics cars, vezer,
Qu'a penas puesc sai mos huelhs retener.

E quar si mes entre.ls gilos aurius
Tan honratz plaitz ni tan rica valors,
A nos cortes es trebalhs e dolors!
Mas d'una ren no.s fassa nulhs esquius,
S'entr'avols gens no pot rics pretz caber,
Car als avols deu tostemps mal saber
So que.l pro fan, per qu'om no.s deu temer.

Del vostre dan, Amics, sui molt caitius,
E quar no.m fai ma domna nulh secors
E destreng mi tan fort la su'amors,
Qu'ieu cug morir cossiros e pessius.
Mala l'amiei, pus no.m deu escazer
E pus no.m puesc de mon dan estener!
Ar sui ieu selh qu'en mi non ai poder.

E si.n paresc a las autras esquius,
Tan vuelh sos bes e tan veulh sas honors,
Don no.m deu ges nozer sa grans ricors.
Qu'anc pus m'ac tot, no fui vas lieis antius,
Enans l'am mais de bon cor e de ver,
Que de ren mais gaug entier non esper!
Grans pechatz er, si.m torn'e nonchaler.

La grans valors e.l pretz nominatius
E.l dous plazers quez a Marseilla sors
Fon guerrejatz per malastrucs trachors,
Mas pueis remas lo mals crims e.l fals brius.
Per que devetz nom de serors aver,
Qu'ambas essems vos fai Dieus mais valer
Mal grat d'aissels que.m fan mon cor doler.

Et irai m'en lai on fo mortz e vius
Nostre Seigner per nos totz pechadors!
E socora.m la soa grans doussors,
Si cum es fis, cars e verais e pius!
E.m lais faire del tot lo sieu plazer.
Et al bon rei don Dieus forsa e lezer
C'aissi puosca son bon pretz mantener.

Na Vierna, tornar e remaner
Volgra ves vos, si m'en dones lezer
Mos Castiatz, mas trop se fai temer.